ඇස් ඇරෙන වෙලාවේ පටන් නින්දට යනකල්
කලබලකාරී හෝරාවන් අස්සේ ඇය සෙව්වේ නිදහස..
රැකියාවට සමු දීමත් සමඟ පැන්ශන් එක නැතිකරගන්න පිස්සුදැයි ඇසූ අයට වැඩිපුරම සිනාවෙන් පිළිතුරු දෙන්නට හැකිවීම යම් සහනයක් වුණත් මිනිස්සුන්ගෙ කතා වලට නොවැටී ඉන්න තරම් ලොකු හයියක් ඒ කාලේ ඇයට නොතිබුණ නිසා හිත අවුල් වෙන අවස්ථා නොතිබුණාම නොවේ.
ඒ වුණත් ඇයගේ ශක්තියට හිත වැටෙන හැම වෙලාවකම ඇයව ඔසවා තබන්න ඔහුට හැකි වුණා.
අලුත් ගෙදරකට මාරු වෙන වෙලාවේ භෞතික නිදහස උදා කරගන්න පුළුවන් වේ කියලා ඇය විශ්වාස කලා.
ඒ එක්කම මානසික නිදහස උදා වෙන බවත් ඇය තදින්ම විශ්වාස කලා.
ගෙදර දේවල් ගැන සම්පූර්ණ නිදහස් තීරණ ගන්න අයිතිය තියෙන්නෙ ඇයට බව හොඳාකාරවම දන්නා දෙයක් වගේම,
කන් පිරෙන්න උපදෙස් දෙන්න අය නැති එකම සැනසීමක් .
“කොහොම වුණත් අවමයෙන් අත්යාවශ්යම දේවල් එක්ක ආරම්භ කරන්න ඕන ” ඔහුත් එක්ක කතා කලාම ඇය ඒ විදියට තීරණ වලට ආවා.
ඊට හරියන්න ලැයිස්තුව සැකසුවා.
අඩුපාඩු මොනවද කියලා හෙමීට හිතන්න පුළුවන් .
මේ හොඳටම ඇති .
අලුත් ගෙදරට බඩු යවපු දවසේ ඒවා ප්රවාහනය කල අය ඇඳන් , අල්මාරිය , ශීතකරණය, රෙදි සෝදනය, මේසය සහ පුටු කිහිපය කලින් පෙන්වූ ආකාරයට නිසි තැන් වල තබා තිබූ නිසා ඇයට තිබුණේ අනෙකුත් දේවල් අසුරාගන්න
පුංචි පැටව් දෙන්නා එක්ක ඕක ලේසි වෙන එකක් නැහැ කියලා වැඩිහිටි කීපදෙනෙක්ම දහ වතාවකට වඩා කියන්න ඇති .
ඒ වුණත් ඇය නිහඬවම වැඩ කරන්න ඕනෑ ආකාරය සැලසුම් කරලා තිබුණා.
ඇයට ඔහුගෙන් ලැබෙන සහායේ අඩුවක් නොමැතිකම එක්ක ඕනෑම වැඩක් කරගැනීම අපහසු දෙයක් වුණේ නැහැ.
අලුතින් දේවල් මිලට ගන්නවා හා සමානව දේවල් ඉවත් කරන්න වෙන බව ප්රායෝගික කාරණාවක් වගේම
ඒ විදියට එකතු වෙන්නේ අපද්රව්ය නම් පරිසරයට ඉන් ඇති කරන සෘණාත්මක බලපෑම සම්බන්ධයෙන් ඇය සතුටුදායක නැහැ.
බිම පෙරළෙන , බඩගාමින් යන දරුවන්ගේ ආරක්ෂාව , සුවපහසුව සඳහා මුල්තැන දෙමින් අත්යාවශ්යම දේවල් එක්ක ජීවිතය ගෙවන ඒ මුල්ම කාලයේ
වැඩ ගොඩ ගැසෙනවා වෙනුවට මහන්සිය අඩු දවස් ගෙවන්න හොඳින්ම අවස්ථාව ලැබුණා.
නිදහස් හිස් අවකාශ නිසා ඔලුවට නිදහසක් වගේම පහසුවෙන් හුස්ම ගන්න පුළුවන් අවකාශයක්,
ඇසට විවේකයක්
මැසිවිලි අවම සන්සුන් නිවසක් …
ඔව් !
හැමවිටම ප්රීතියෙන් නිස්කලංකව ජීවිතය ගෙවෙන්නට හේතු වුණා .
අදටත් , ඒ කාලයෙන් අවුරුදු හත හමාරකට පසුත් ඇය ඒ නිදහසේ සුවය විඳිනවා෴
මේ සටහනේ ඇය මමයි.
මේ විදියට වෙනස් කරගත් ජීවිත කතාවේ අවස්ථා ලියන එක මට ලොකු සතුටක් .
(තව කොටසක් ආයෙම ලියන්නම් . දැනට මේ ඇති . වැඩි විස්තර සරල මං පොතේ තියෙනවානේ)