මට කතා කල යාලුවෙක් කියනවා ඔයා නම් දිනලා ඉවරයි කියලා .
ඇත්තටම අපි කතා කලේ ජීවිතය ගැන.
අපේ වයස එක්ක වැඩිපුරම අපේ සෞඛ්ය ගැන .
ගොඩක් අය අවුරුදු පනහ , පනස් පහ සමහරවිට අවුරුදු හැට වගේ වෙනකොට විශ්රාම අරන් සතුටින් ඉන්නට ඕනෑ යැයි සැලසුම් කරනකොට කෝච්චිය ගිහින් හමාර වෙන්න පුළුවන් .
මම අවුරුදු තිහෙන් වගේ ආරම්භ කල වෙනස එක්ක මම කැමතිම විදියට මගේ ජීවිතය ගෙවෙනවා කියන එක සත්යයක්.
ඒ වෙනුවෙන් මම කල සමහර කැපකිරීම් හෝ අතහැරීම් හෝ හැමෝටම එකම ආකාරයට ගැළපෙන්නේ නැහැ.
ඒ කාලේ මට ඕන වුණේ සාමාන්ය රටාව වෙනසක් කරගන්න.
පවුලක් ඇතුලේ තියෙන සහයෝගය එක්ක ඒක හොඳින්ම කරන්න පුළුවන් ද බැරිද යන්න තීරණය වෙනවා.
මම එසේ වෙනස් නොවුණා නම් ,
මම හිටපු විදිය එක්ක ,
තරඟකාරී ලෝකය තුල හෙම්බත් වූ ජීවිතයක සාඩම්බර හිමිකාරියක් වෙන්න ඉඩ තිබුණා.
සාමාන්ය මිනිස්සු විදියට අපි කවුරුත් මලෙන් උපන් අය නෙවේනේ,
ඉතින් එපා වීම් තිබුණා. කඩාවැටීම් තිබුණා. මගේ නරක ගති බොහෝමයක් තිබුණා. !!
මම හිතන්නේ ඒවා හරිම සාමාන්යයි.
නමුත් මට ඕන වුණේම , ජීවිතය නිදහසේ ගෙවන්නේ කොහොමද කියලා වෙනසක් කරගන්න.
මාව තේරුම් අරන් මාව වෙනස් කරගන්න. ඒක මම ටිකෙන් ටික කලා.
ඉන්පස්සේ ලැබුණු හැම යහපත් වෙනසක්ම මේ ජීවනරටාව එක්ක මට ලැබුණු දේවල්.
ඒ නිසාමයි “සරල මං ” පුංචි පොත වුණත් මගේ අත්දැකීම් ඇසුරෙන්ම ලියවුණේ.
ටිකෙන් ටික ඇති කරගත් වෙනස්කම් එක්ක හැමදේම සන්සුන්ව සිදුවෙන්නට වුණා.
අදටත් ,හැමදවසකම මම මට ඉලක්ක තියා ගන්නවා.
“වතුර ලීටර දෙකක් පානය කිරීම වගේ “ඒවා හරිම පුංචි ඒවා වෙන්න පුළුවන් .
නමුත් පුංචි වුණත් ඉලක්ක තබාගෙන වැඩ කිරීම දවස් සතුටින් ගෙවෙන්න හේතුවක් . දවස අවසානයේ මම දිහා තෘප්තිමත් හැඟීමෙන් බලන්න ඒ පුංචි ඉලක්කය වුණත් මට හරිම වැදගත් .
මම සතුටින් සිටීම මා වටා බැඳුණු පවුලේ සාමාජිකයන් පවා සතුටින් ඉන්න හේතුවක් .
ඒවා එකින් එක මේවායි කියලා මම විස්තර කරන්නේ නැහැ , අපි එකිනෙකා ඉලක්ක විදියට තබාගන්නා දේවල් පුද්ගලානුබද්ධයි නේ.
කොහොම වුණත් මම එක්කම මම තරඟ කරනවා. දරුවන් පවා ඒක දකිනවා.
මොකද මම ඒ ගැන එයාලා එක්ක කතා කරනවා.
“අනික් අය කොහොමද කරන්නේ , මොනවද කරන්නේ ඊට වඩා මම කරන්න ඕනේ කියන දේ වෙනුවට ,
මම අද ඉන්නෙ කොහොමද – අදට වඩා හෙට වෙනකොට මගේ වෙනස් කරගන්න ඕන මොනවද කියන දේ එයාලගේ ඔලුවට වැටිලා තියෙන එකම සතුටක්.
ඒක මම ෆීඩ්බැක් එකක් විදියට එයාලගෙන් දකිනවා
සහ එයාලා මටත් මතක් කරලා දෙන අවස්ථා ද තියෙනවා.
අරමුණු , ඉලක්ක තියාගන්නා ගමන් මේ මොහොතේ සතුටින් සිටීම ජීවිතය පහසු කරනවා. ෴